Rusiyanın Kazan şəhərində keçirilən I MDB Oyunlarında bu gün Azərbaycan təmsilçiləri 3 növdə mübarizə aparıblar. "Report"un yarışa ezam olunmuş əməkdaşı xəbər verir ki, kəmər güləşində təsnifat və medal görüşləri keçirilib. Bu növdə kişilərdən Nahid Vəliyev (57 kq) və Məhərrəm Eyvazov (68 kq), qadınlardan isə Sənubər Nəbiyeva (66 kq) və Aytəkin Paşazadə (76 kq) çıxış edib.
Onlardan yalnız Nəbiyeva cəmi bir görüşdə qalib gələrək, bürünc medala layiq görülüb. Bu, həm də Azərbaycanın gün ərzində qazandığı yeganə medal olub. Qalan pəhləvanların hamısı bütün qarşılaşmalarından məğlub ayrılıblar.
Tayboks növündə Musa Nuruzadə (57 kq) və Məhər Əsədzadə (63,5 kq) təsnifat görüşünə çıxıb. Nuruzadə döyüşündən məğlub ayrılıbsa, Əsədzadə erməni rəqibini vaxtından əvvəl nokautla yenib.
Basketbolun 3X3 növündə B qrupunda yer alan Azərbaycan millisi isə iki görüş keçirib. İlk qarşılaşmasında Qırğızıstana 16:10 hesabı ilə qalib gələn yığma növbəti matçında Belarusa uduzub - 12:20. Samit Nuruzadənin baş məşqçi olduğu kollektivdən ən çox xalı Əndər Poladxanlı yığıb. O, Qırğızıstanla görüşdə 9, Belarusla oyunda 4 xal toplayıb.
Sentyabrın 6-da keçiriləcək yarımfinal görüşündə Azərbaycanın rəqibi Rusiya olacaq. Görüş Bakı vaxtı ilə saat 16:00-da başlayacaq. Digər yarımfinal qarşılaşmasında isə Belarus Özbəkistanı sınağa çəkəcək.
I MDB Oyunları
5 sentyabr
Kəmər güləşi
Keçirilmə yeri: "Ak Bars" Döyüş Növləri Sarayı
Təsnifat mərhələsi
Kişilər
57 kq
Nahid Vəliyev - Jandos Abubəkirov (Qazaxıstan) - 4:5
Nahid Vəliyev - Yeqor Kulyomin (Rusiya) - 4:5
Nahid Vəliyev - Kenjebay Narınbay Uulu (Qırğızıstan) - 2:5
Nahid Vəliyev - Komronbek Ortikov (Özbəkistan) - 2:5
68 kq
Məhərrəm Eyvazov - Firuzçon Ziyoyev (Tacikistan) - 1:4
Məhərrəm Eyvazov - Həbibullo Tınçtık Uulu (Qırğızıstan) - 5:5*
Qadınlar
66 kq
Sənubər Nəbiyeva - Alfina Fəxrətdinova (Rusiya) - 5:6
Sənubər Nəbiyeva - Məftunəbanu Mahmudova (Özbəkistan) - 3:5
Sənubər Nəbiyeva - Asıljan Orınbasarova (Qazaxıstan) - 7:4
Sənubər Nəbiyeva - Əzəmi Kamçıbekova (Qırğızıstan) - 5:4
76 kq
Aytəkin Paşazadə - Zemfira Azatova (Özbəkistan) - 4:6
Aytəkin Paşazadə - Angelina Mentiy (Rusiya) - 5:6
Aytəkin Paşazadə - Kaldıqul Beket (Qazaxıstan) - 4:7
Basketbol (3X3)
Keçirilmə yeri: URAM Ekstrim Park
B qrupu
Qırğızıstan - Azərbaycan - 16:10
Belarus - Azərbaycan - 20:12
Tayboks
Keçirilmə yeri: "Tulpar" Universal İdman Kompleksi
57 kq
Musa Nuruzadə - Faxriddin Həsənov (Özbəkistan) - 27:30
63,5 kq
Məhər Əsədzadə - Alen İsraelyan (Ermənistan) - nokautla qələbə
Bu nəticələrdən sonra Azərbaycan I MDB Oyunlarında 6 qızıl, 4 gümüş və 12 bürünc medal qazanaraq, ümumi hesabda 9 iştirakçı ölkə arasında 3-cü yerə enib. İkinci pilləyə 33 medalla (13 qızıl, 12 gümüş, 8 bürünc) Özbəkistan yüksəlib. Birinci pillədə isə Rusiya 60 medalla (34 qızıl, 14 gümüş, 12 bürünc) qərarlaşıb.
pia.az